1 Kings 2

UDavida Ulaya uSolomoni

1Kwathi isikhathi sokuthi uDavida afe sesisondele, walaya indodana yakhe uSolomoni.

2Wathi, “Sengiseduze ukuyiphetha indlela yemhlabeni. Ngakho qina, zitshengisele ubudoda bakho, 3unanzelele lokho okufunwa nguJehova uNkulunkulu: Hamba endleleni yakhe, ugcine imilayo leziqondiso zakhe, imithetho yakhe kanye lokuswelakalayo: Hamba ezindleleni zakhe, ugcine izimiso zakhe leziqondiso zakhe, imithetho yakhe lokulotshiweyo ngokoMthetho kaMosi, ukuze uphumelele kukho konke okwenzayo kanye lalapha oya khona, 4ngalokho uJehova uzagcina isithembiso sakhe kimi: ‘Nxa isizukulwane sakho sizananzelela izindlela zokuphila kwaso, njalo sizahamba ngobuqotho phambi kwami ngezinhliziyo zaso lasemoyeni waso, awuyikwehluleka uswele indoda ezahlala esihlalweni sobukhosi ko-Israyeli.’

5“Wena ngokwakho uyakwazi ukuthi uJowabi indodana kaZeruya wenzani kimi – ukuthi wenzani kubalawuli bamabutho ako-Israyeli, u-Abhineri indodana kaNeri lo-Amasa indodana kaJetheri. Wababulala, wachitha igazi ngesikhathi sokuthula kwangathi kusempini, ngalokho igazi langcolisa uzwezwe okhalweni lwakhe lenyathelo ezinyaweni zakhe. 6Yenza lokho obona kufanele kuye, kodwa ikhanda lakhe elimpunga ungavumeli lingcwatshwe ngokuthula.

7“Kodwa ube lomusa kumadodana kaBhazilayi weGileyadi babe ngabanye balabo abazakudla kanye lawe ethaleni lakho. Bona bema kanye lami nxa ngangibalekela umfowenu u-Abhsalomi.

8“Njalo ukhumbule ukuthi, wena ulendodana kaGera uShimeyi ongowakoBhenjamini oweBhahurini owangithuka kabuhlungu mhla ngisiya kuMahanayimi. Wathi lapho ezongihlangabeza eJodani, ngafunga ngoJehova ngathi: ‘Angiyi kukubulala ngenkemba.’ 9Kodwa loba kunjalo ungabonakana ukuthi umsulwa. Uyindoda elengqondo ekhaliphileyo, kumele ukwazi ozakwenza kuye. Yethula ikhanda lakhe elimpunga liye emagcwabeni ligcwele igazi.”

10Kwaba yikwedlula kukaDavida esesiya kuboyise abafayo wayangcwatshwa eMzini kaDavida. 11Wayesebuse okweminyaka engamatshumi amane ko-Israyeli – iminyaka eyisikhombisa eHebhroni kwathi engamatshumi amathathu lemithathu eJerusalema. 12Ngakho uSolomoni wahlala esihlalweni sobukhosi sikayise uDavida, umbuso wakhe wagxila waqina.

Ukuzinziswa Kombuso kaSolomoni

13Kwathi u-Adonija, indodana kaHagithi, waya kuBhathishebha, unina kaSolomoni. UBhathishebha wambuza wathi, “Kambe uza ngokuthula na?” Yena waphendula wathi, “Ye, ngokuthula.”

14Waqhubekela phambili wathi, “Kukhona engifisa ukukutsho kuwe.” Wathi, “Ungatsho lokho oza ngakho.”

15“Njengoba usazi ukuthi ubukhosi bebungobami. U-Israyeli ubekhangele ukuthi yimi inkosi yabo. Kodwa izinto seziguqukile, ubukhosi sebuthethwe ngumfowethu, ngoba yena ubuphiwe yinkosi. 16Pho khathesi ngilesicelo engiza ngaso kuwe. Ungabokwala.” Waphendula wathi, “Khuluma isikhalazo sakho.”

17Yena waqhubekela phambili wathi, “Ngoxolo, ngicelela inkosi uSolomoni – ngiyazi ngeke ale kuwe – ngicela anginike u-Abhishagi umShunami ukuze abe ngumfazi wami.”

18UBhathisheba waphendula wathi, “Yebo kambe, ngizakukhulumela ngikubike enkosini.”

19Kwathi uBhathisheba esiyakhulumela u-Adonija enkosini uSolomoni, inkosi yaphakama yamhlangabeza yamkhothamela yasihlala esihlalweni sayo sobukhosi. Yathi kabalethele unina isihlalo sesikhosini, unina wasehlala esandleni sayo sokudla.

20Unina wathi, “Ungabokwala, ngilesicelo esincane engizasethula kuwe.” Inkosi yaphendula yathi, “Cela mama, angiyikukuncitsha, angikwaleli.”

21Unina wasesithi, “Yekela u-Abhishagi umShunami abe ngumfazi womfowenu u-Adonija.”

22INkosi uSolomoni ephendula unina wathi, “Kungani ucelela u-Adonija u-Abhishagi umShunami? Kuyafanana lokuthi umcelela ubukhosi – kanti njalo, yena ngokwakhe umnewethu umdala kulami – yebo yena, kanye laku-Abhiyatha umphristi loJowabi indodana kaZeruya!”

23Ngakho inkosi uSolomoni yasifunga ngoJehova yathi: “Kungani uNkulunkulu angangijezisa mina, loba kabuhlungu kanganani, nxa u-Adonija engasahlawulanga ngokufela lesisicelo esinje! 24Khathesi-ke, ngeqiniso likaJehova ophilayo – yena kanye ongibeke wangizinzisa esihlalweni sobukhosi bukababa uDavida wangidalela indlu yesikhosini njengokuthembisa kwakhe – u-Adonija uzabulawa lamhlanje!” 25Ngakho iNkosi uSolomoni yakhipha ilizwi yathuma uBhenaya indodana kaJehoyada, lakanye wamlahla phansi u-Adonija kwahle kwaba yikufa kwakhe.

26Ku-Abhiyatha umphristi iNkosi yathi, “Buyela emasimini akho e-Anathothi. Kufanele ufe kodwa angiyikukubulala khathesi, ngoba wathwala ibhokisi lesivumelwano soPhezukonke uJehova phambi kukababa uDavida waba kanye lobaba esebunzimeni.”

27Ngakho uSolomoni wasusa u-Abhiyatha esihlalweni sobuphristi bukaJehova, kwagcwaliseka lelo lizwi likaJehova alikhipha eShilo ekhuluma ngendlu ka-Eli.

28UJowabi ekuzweni lelilizwi, njengoba yena wayekade ebambene lo-Adonija engazange enze lokho lo-Abhsalomi, wabalekela ethenteni likaJehova wafika wadumela impondo zealithare.

29Inkosi uSolomoni yatshelwa ukuthi uJowabi ubalekele ethenteni likaJehova lapha afike wazisondeza e-alithareni. Ngalokho uSolomoni wathi kuBhenaya indodana kaJehoyada, “Hamba uyemtshaya umbhuqe.”

30Lakanye uBhenaya wangena ethenteni likaJehova wathi kuJowabi, “Inkosi ithi, ‘Phuma phandle!’ ” Kodwa yena waphendula wathi, “Angiphumi, ngizafela khonapha.” UBhenaya wayabika enkosini wathi, “Yiyonale indlela angiphendule ngayo uJowabi.”

31Ngalokho inkosi yathi kuBhenaya, “Yenza njengokutsho kwakhe. Umtshaye umbhuqe, uhle umngcwabe, ukuze ungigeze mina kanye lendlu kababa kulowomlandu wegazi elingelacala elachithwa nguJowabi. 32UJehova uzamjezisa ngegazi alichathayo, ngoba wahlasela wabulala amadoda amabili ngenkemba ubaba inkosi uDavida engakwazi. Bobabili u-Abhina indodana kaNeri, umlawuli wamabutho ako-Israyeli, kanye lo-Amasa indodana kaJetheri, umlawuli wamabutho akoJuda – babengamadoda angcono beqotho kulaye. 33Kungani umlandu waleligazi labo ungahlala phezu kukaJowabi labenzalo yakhe kuze kube nini lanini. Kodwa inkosi uDavida lenzalo yakhe, lendlu yakhe lesihlalo sobukhosi sakhe, angathi ingehlelwa yikuthula okungapheliyo kukaJehova.”

34UBhenaya indodana kaJehoyada wakhwela wafika wamtshaya uJowabi wambulala wayangcwatshwa esiqintini sakhe enkangala. 35Inkosi yabeka uBhenaya indodana kaJehoyada ukuba abe ngumlawuli webutho esikhundleni sikaJowabi kwathi esikhundleni sika-Abhiyatha yabeka uZadoki umphristi.

36Ngakho inkosi yathi kayibizelwe uShimeli yasisithi kuye. “Zakhele indlu eJerusalema uhlale khonale, kodwa ungayi ndawo. 37Mhla uzake usuke uchaphe uye eziHotsheni zeKidroni, uhle wazi ngeqiniso ukuthi uzakufa, igazi lakho lizabizwa phezu kwakho.”

38UShimeyi wayiphendula inkosi wathi, “Lokho okutshoyo kuqondile. Inceku yakho izakwenza njengoba inkosi yami itshilo.” Ngakho uShimeyi wahlala eJerusalema isikhathi eside.

39Kodwa kwathi sekwedlule iminyaka emithathu, izigqili zikaShimeyi ezimbili zabalekela ku-Akhishi indodana kaMayakha, inkosi yeGathi, njalo uShimeyi watshelwa ukuthi, “Izigqili zakho ziseGathi.” 40Ekuzwa lokhu, wethesa ubabhemi wakhe waya ku-Akhishi eGathi esiyadinga izigqili zakhe. Ngakho uShimeyi wabuya lazo izigqili zakhe evela eGathi.

41USolomoni esetsheliwe ukuthi uShimeyi wayesuke eJerusalema waya eGathi waze waphenduka, 42inkosi yambiza uShimeyi yathi kuye, “Angizange ngikufungise ngoJehova njalo ngakuqonqonsela ukuthi, ‘Mhla uzake usuke uye kwenye indawo uhle wazi ukuthi ngempela uzakufa na?’ Ngalesosikhathi wathi kimi, ‘Okutshoyo kuqotho. Ngizalalela.’ 43Pho kungani ungagcinanga isifungo sakho kuJehova ulalele isiqondiso engakunika sona?”

44Inkosi njalo yathi kuShimeyi, “Uyakwazi enhliziyweni yakho konke ukona owakwenza kubaba uDavida. Khathesi uJehova uzakujezisa ngokona kwakho. 45Kodwa iNkosi uSolomoni izabusiswa, isihlalo sobukhosi sikaDavida sizahlala siqinile ngokuzinza phambi kukaJehova kuze kube nini lanini.”

46Ngakho yakhupha isiqondiso kuBhenaya indodana kaJehoyada, yena waphuma wafika wamnqonda uShimeyi wamlahla phansi wahle wambulala. Ngalokho ubukhosi basebusezandleni zikaSolomoni ngokugcweleyo.